மக்களின் குரல்

மண்முனைப்பற்று பிரதேசத்தில் மேற்கொள்ளப்பட்டுவரும் திட்டமிட்ட குடியேற்றங்கள் சட்டத்திற்கு முரணானது. இது நிறுத்தப்பட வேண்டும். கடந்த காலங்களில் இவ்வாறான குடியேற்றங்களினாலேயே தமிழ் முஸ்லிம் இனங்களிடையே இனமுறுகலலும், கலவரங்களும் ஏற்பட்டது. இது போன்று மீண்டும் இவ்வாறான நிலையில் திட்டமிட்ட சில முஸ்லிம் குழுக்களால் தாழங்குடா, வேடர் குடியிருப்பு, ஆரையம்பதி கிழக்கு பகுதிகளில் வேலி இடப்பட்டு அரச காணிகளும் தனியார் தமிழருக்குரிய காணிகளும் சுவீகரிப்புச் செய்யப்படுவதும், பின்பு அவை சிறு சிறு துண்டுகளாக பிரிக்கப்பட்டு வேறு பிரதேசங்களில் இருந்து மக்களைக் குடியமர்த்துவதற்கும்,br />

முயற்சிகள் மேற்கொள்ளப்பட்டு வருகின்றது. இது தொடர்பாக பலமுறை பிரதேச செயலாளர் பொலிசாருக்கு அறிவித்துள்ளதுடன், நீதிமன்றத்திற்கும் சென்றுள்ளார். ஆனால் இவை குறைந்தபாடாக இல்லை. இதனைத் தடுப்பதற்கு மாவட்ட அபிவிருத்திக் குழு நடவடிக்கை எடுக்க வேண்டும் என கிழக்கு மாகாண சபை உறுப்பினரும், கிழக்கு மாகாண முதலமைச்சரின் இணைப்புச் செயலாளருமான பூ.பிரசாந்தன் கச்சேரியில் நடைபெற்ற மாவட்ட அபிவிருத்திக் குழுக் கூட்டத்தில் தெரிவித்தார்.இதனைத் தொடர்ந்து கருத்துத் தெரிவித்த மாவட்ட அபிவிருத்திக் குழு இணைத் தலைவர் எம்.எல்.ஏ.எம்.ஹிஸ்புல்லா வெளிப் பிரதேசங்களில் இருந்து திட்டமிட்டு குடியேறுவது சட்டத்திற்கு முரணானது. இது தொடர்பாக தீர்மானம் எடுக்கும் உரிமை பிரதேச செயலாளர்களுக்கு உள்ளது என சுட்டிக்காட்டியதனை அடுத்து, எதிர்வரும் காலங்களில் இவ்வாறான திட்டமிட்ட குடியேற்றங்களுடாக இனங்களைக் குழப்ப நினைக்கும் சக்திகளுக்கு எதிராக சட்ட நடவடிக்கை எடுப்பதற்கு மாவட்ட அபிவிருத்திக் குழு ஆணை வழங்க வேண்டும் எனவும் விஷேட குழு அமைக்கப்பட்டு ஆராயப்பட வேண்டும் எனவும் கிழக்கு மாகாண சபை உறுப்பினர் பூ.பிரசாந்தன் குறிப்பிட்டார்.

உலக இரத்த நன்கொடையாளர் தினத்தையொட்டி இரத்த தானம் செய்தவர்களை கௌரவிக்கும் நிகழ்வொன்று மட்டக்களப்பு நாவற்குடா இந்து கலாசார மண்டபத்தில் நேற்று வியாழக்கிழமை மாலை நடைபெற்றது.

நாவற்குடா சின்ன லூர்த்து ஆலயம், நாவற்குடா புனித மரியால் ஆலயம், சிவானந்த விளையாட்டுக்கழகம், சிவானந்தா இளைஞர் கழகம், சுகாதார நல கல்வி நிலையம் என்பன இணைந்து இந்நிகழ்வை ஏற்பாடு செய்திருந்தன.

புனித லூர்துமாதா ஆலய பங்குத்தை அருட்தந்தை எக்ஸ்.ஐ.ரஜீவன் தலைமையில் இடம்பெற்ற இந் நிகழ்வில் கல்லடி, கிழக்கு பல்கலைக்கழக சுவாமி விபுலானந்தர் அழகியற் கற்கைகள் நிறுவகத்தின் பணிப்பாளர் கலாநிதி கே.பிரேகுமார், மட்டக்களப்பு போதனா வைத்தியசாலையின் இரத்த வங்கியின் வைத்திய அதிகாரிகளான டாக்டர் திருமதி யாழினி, திருமதி தேவராஜா உட்பட ஆலயங்களின் பங்குத்தந்தைகள், முக்கியஸ்த்தர்கள் என பலரும் கலந்து கொண்டனர்.

இதன்போது கல்லடி தொடக்கம் ஆரையம்பதி வரையிலான பகுதிகளில் உள்ள இரத்த நன்கொடையாளர்கள் சான்றிதழ் வழங்கி கௌரவிக்கப்பட்டனர்.

எதிர்வரும் காலங்களில் இரத்த நன்கொடையாளர்களின் சேவைகளை அதிகளவில் பெற்றுக்கொள்ளுமுகமாகவே இவ்வாறான நிகழ்வுகள் நடத்தப்படுவதாக அருட்தந்தை எக்ஸ்.ஐ.ரஜீவன் தெரிவித்தார்.